Union Ladins Fodom

La nosta sezion

L'Union dei Ladins da Fodom l'é stada metuda su a La Plié ntel 1968, ruada davoprò e col sosten dei movimenc ladins vegnus fora bele ntel Nuofcënt e deventei gaierc e plu sentus da la jent davò la viera; la ULF la fesc pert de la Union Generela di Ladins dle Dolomites.

L'Union da Fodom, coche disc l statut, la vol "slargé fora e stravardé l patrimone del descore ladin e del folklor", per tegnì auna l liam coi autri ladins del Sela e per daidé pro l'economia de la val, fata de agricoltura, artejanat e turism.

Trope i é stade le scomenciadive nte la longia ativité de la Union da Fodom.

Auna a le tánte publicazion che se po' vedei nte la bibliografia de chëst scito, toca fè memoria del Congresc del dell'A.I.D.L.C.M.
(Associazione Internazionale per la Difesa delle Lingue e Culture Minacciate) che l é sté fat a La Plié ntel setember del 1974, e che l à bù na valuda per dute le culture de minoránza del mondo.

L'Union Ladins Fodom ntel scomencé l'à bù ence n suo boletin, "El Feral" vegnù fora no per trop a la longia ajache no n eva i scioldi per l mané n'avánt. L setimanal La Usc di Ladins l é deventé l folgio che ten auna dute le val del Sela, ulache se liec fora le nuove de vigni valada ladina.

La Ulf, ntel temp, l'à trat su i libri e i documenc che auda l mondo ladin e desferenc argomenc coscita da njigné ca na picola biblioteca che l'é dalvierta a la jent.
Union Ladins Fodom
Union dei Ladins da Fodom
Cesa de la Cultura Fodoma
Via Pieve 78
32020 Livinallongo, Belluno
C.F. 80007360250
Union Generela di Ladins dla DolomitesUniun Ladins Val BadiaUnion di Ladins de GherdëinaUnion di Ladins de FasciaUnion de i Ladis de Anpezo
© Union Ladins Fodom
produced byQBUS srl