Union Ladins Fodom

L’evoluzion storico –politica de le comunité ladine ntel nuofcënt nfin al di da ncuoi (L.Palla)

Trat fora dai ati del Convegn fat a Reba ai 7-8 de november del 1997 "Le minoranze del Veneto: Ladini, Cimbri e Germanofoni di Sappada"

L'anescion a l'Italia

Ci che à caraterisé la sort dei ladins de le Dolomiti ntel milenuofcënt l é sté la pruma viera mondial, veduda ncora ades come n fat che a dé n tai col temp davántvia: difati la viera l'à porté a l'anescion dei ladins al Regno d'Italia col tratat de pesc ntel 1919 e con chësta a la fin del liam col tirol-austriaco che l jiva nnavánt oramei da scecoi, liam trop sentù da la jent de le val ladine che co l'Italia l'ava ben puoch da ci fè.

Nfin al scomencié de la viera l'economia de la jent ladina la jiva deberiada con chëla austriaca: l'aministrazion l'eva tiroleje, l ordinament e la scola i eva i medemi de chi de l'Austria e ai comuns vegniva dé tropa liberté. Chëst l é dal dì percieche l é de gran mportánza recordé chësta pert de storia de le val ladine che se deferenzia da la storia veneta e taliana che à bù l Comelico, l Agordin e l Ciadoure.

L liam de pregio che ava i ladins col Tirol l eva sté trop ejalté da pert todëscia; de contra vigni sort de comunánza e de ideologia che l eva ntra ladins e tiroleji l'eva stada negada da pert taliana: difati i nazionalismi taliagn e todësć de chël scecol i ava proé de se tò su vigniun a modo suo la cuestion ladina ma ntel fè i no n ava cialé soura polito a chëla che l'eva la realté de chël mondo coscita da frené l nasce de na autocoscienza autonoma e indipentent. Da pert taliana la particolarité ladina l'eva stada negada per daidé pro l'anescion a l'Italia, da pert todëscia l eva sté idealisé l liam ladin-tiroleje per podei jì nnavánt co la germanisazion scomenciada bele davánt l'anteviera e che ruarà a piz ntel tratat de le opzion ntel 1939 che tol ite ence le val ladine.

L'anescion a l'Italia l'à volù dì per i ladins del Sela se scontré co na realté politica, cultural e economica del dut desferenta da chëla vivësta davántvia, la jent ava proé per troc agn a la longia de se arvejené ndavò al vecio ma tánt sentù tirol e, ntel medemo temp, i jiva nnavánt co la rivendicazion de la sua particolarité etnico-linguistica damanada bele a mez del votcënt e ruada velchamia a reclamé perfin l'indipendenza e l'autonomia cultural.

Per chël che auda l'identité, portada nnavánt mefo dan grop de elites mpruma de la viera, la deventa na priorité per la jent davò l'anescion a l'Italia auna a la tres plu grana coscienza etnico-linguistica dei ladins, che i vol tegnì su la sua particolarité social, economica e cultural: degugn podëva savei ci che assa porté la diversité taliana e l eva da defende e jì nnavánt co la trop sentuda specificité ladina. La storia, l lengaz e le tradizion le risćiava coscita de jì perdude percieche l nuof stato talian no le recugniscëva, gnánca ntei prums agn davò la viera cánche l eva sté mprometù l rispet de le nuove province e, tánto mánco, sot al fascismo, cánche i ladins i vegniva consciderei mefo dei taliagn che sot l nazionalismo todësch i s'ava descmentié le sue origini, de segur taliane. Cotánt che la ladinité l'eva sterca ntei agn davò la viera l eva sté desmostré dai dac del censiment de la popolazion fat ntel 1921: nzirca daperdut la jent de le val ladine del Sela la s'ava declaré ladina al 90 – 100%.
Tost davò la viera i ladins, con trope petizion, i ava damané de podei avei na sua autogestion legitimada dal fato de ester recugniscius come n grop etnico desferenzié – no na deferenzia de raza ma dada da na sua specifizité-, i ava proé de tegnì su l liam de le cinch val ladine, i volëva a duc i costi defende l lengaz e, ntel medemo temp, i ava azeté de fè pert de la minoránza del Sudtirol. Chëst liam col Tirol n sceguito l eva sté da spës colpevolisé percieche conscideré, ence con rajon, la cauja del se ntardivé del nasce de na coscienza ladina che jiva per conto suo. Dut chëst l eva ence da giustifiché percieche ntel prum moment i tiroleji, ntel damané la sua autodeterminazion e colesté l'autonomia, i s'ava tout su la cuestion ladina che autramente la no n'assa bù deguna ousc n merito.

Zerto che, per poura de ester italianisei, i ladins i no n'ava tegnù d'acot del pericol de germanisazion e, mascima ntra l 1939 e l 1945, i ava bù trope dificolté a cierne fora na politica che se destache da chëla todescia, con n efeto negatif per la comunité. Ma se mossa ence dì che dut chëst no fossa suzedù se i ladins i assa podù avei na chelche consciderazion, se i no n'assa tres bù debujen den aleat plu gaiert per fè sentì la sua ousc: la realté storica, socio-cultural e de lengaz de chëste comunité l'eva stada del dut lasciada da pert ajache i ladins, al contrario de ci che i damanáva, i eva stei loghei fora n trei provinzie desferenti ntel scomencé del 1923, cánche i comuns da Fodom, Col e Ampëz i eva stei metus pro a la provincia de Belum, coscita dai spartì fora del dut, no demè sul teritor.
Union Ladins Fodom
Union dei Ladins da Fodom
Via Roma 80, Centro Dolomiti
32020 Livinallongo, Belluno
C.F. 80007360250
Union Generela di Ladins dla DolomitesUniun Ladins Val BadiaUnion di Ladins de GherdëinaUnion di Ladins de FasciaUnion de i Ladis de Anpezo
© Union Ladins Fodom
produced byQBUS srl